Iglesia E Porta ta un iglesia kristian. Esaki ta nifiká ku nos ta kere ku Hesus ta e Yu di Dios i ku e Bèibel ta e palabra di Dios. E Bèibel ta diskribí Dios komo kreador di universo, pero tambe komo un Dios personal. Un Dios ku nos por siña konosé i ku ke konosé nos. Un Dios di amor ku ke ta nos Tata Selestial.
Nos ta kere ku un relason personal asina’ki ta posibel solamente atrabes di Kristu Hesus. Bèibel ta yam’E e Yu di Dios i ta presentÉ igual na Dios. E tabata 2000 aña pasá riba mundu i a biba komo un ehèmpel pa nos, pero E tabata mas ku esey. E la hasi hopi milager i sana tur e enfermonan ku nan a trese serka djE.

Sakrifisio
Pero apesar di esaki e hendenan tabata tin odio kontra djE i a krusifiké. E por a eskohé pa no laga esaki sosodé, pero e krusifikashon di Hesus tabata e sakrifisio di Dios pa henter e humanidat. Di e manera aki Dios a paga e prèis pa e erornan i pikanan den nos bida, pasombra nos mes no ta kapas pa paga e prèis aki. Ta pesei Dios por ta tantu un Dios hustu komo un Dios di kompashon.

Un bida nobo
Pa motibu di e sakrifisio aki nos por pidi Dios misèrikòrdia i pordon pa nos pikanan, si nos ta sinsero i nos arepentí di nos pikanan. E Bèibel ta yama e kos aki kombershon (repentimentu). Dios por duna nos e ora ei un bida nobo. Un bida nobo kaminda e relashon entre nos i Dios ta wòrdu restourá. E imahen i e prueba di esaki ta ku Hesus despues di tres dia di su krusifikashon a lanta for di morto.
Un relashon asina’ki ta posibel atrabes di e sakrifisio di Hesus na e krus di Kalvario, pero naturalmente ta importante pa nos sigui tra riba nos relashon ku Dios. Esaki ta posibel dor di lesa bo Bèibel, hasi orashon (papia ku Dios) i bishitá un iglesia kaminda e Palabra di Dios ta wòrdu prediká. Dios di e manera aki por papia ku bo kurason i kontestá bo orashonnan.